«Եթե զգամ, որ կհաղթեմ, նորից կմասնակցեմ «Միսս Արմենիային»». «Վիցե միսս Արմենիա» Մոնիկա Գրիգորյանը՝ միջազգային մրցույթների մեկնելու, ավելի ինքնավստահ դառնալու և մոդելային կարիերայի մասին
«Միսս աշխարհ Արմենիա» մրցույթի մասնակիցների լուսանկարների տարածումից հետո քննարկումների կենտրոնում հայտնվեց 20-ամյա Մոնիկա Գրիգորյանը Վանաձորից: Բուն մրցույթում աղջիկը զբաղեցրեց 2-րդ տեղը, սակայն մրցույթը նրա համար մոդելային կարիերայի սկիզբ դարձավ: Ամռանը նա մեկնել էր միջազգային մրցույթի, ևս մեկ մրցույթի մեկնելու է առաջիկայում:
Tert.am Life-ը Մոնիկայի հետ զրուցել է մոդելային կարիերայի, հաղթանակից մեկ քայլ հետ մնալու և «Միսս Արմենիային» կրկին մասնակցելու պայմանի մասին:
Պատրաստվում եմ ներկայանալ միջազգային մրցույթում
«Միսս Արմենիայից» հետո Մոնիկան սկսել է մոդելային կարիերան: «Մեկնել էի Miss tourism of the globe 2019 մրցույթին: Մրցանակային տեղ չզբաղեցրի, քանի որ վիզայի տրամադրման հետ կապված խնդիր կար, 10 օր ուշ մեկնեցի, մասնակցեցի միայն եզրափակիչ ելույթին: Քանի որ չէի մասնակցել նախնական փուլերին, որոնց ընթացքում ժյուրին ճանաչում է մասնակիցներին, կայացնում իր որոշումները, գիտեի, որ արդյունք չեմ ունենալու: Գնացի, վայելեցի և մեծ փորձ ձեռք բերեցի: Առաջիկայում մեկնելու եմ Վիետնամ՝ մասնակցելու Miss Charm International 2020 մրցույթին: Այս անգամ ավելի պատրաստված ու մրցակցային տրամադրությամբ եմ մեկնելու: Ավելի լավ եմ պատրաստվում: Նախորդ անգամ չգիտեի կմեկնե՞մ, թե՞ ոչ, նույնիսկ հագուստներն եմ վերջին պահին ընտրել,- ասաց նա, միաժամանակ հավելեց, որ միջազգային մրցույթի մեկնելիս չպետք է մտածել, անպայման, հաղթելու մասին, առաջին հերթին դա մեծ փորձ է: -Եթե նաև տիտղոս ստանաս, շատ ավելի լավ, բայց եթե տրամադրվես միայն հաղթանակի, կարող ես հիասթափվել»:

Մոնիկայի խոսքով՝ այս փուլում աշխատում է զարգացնել անգլերենի իմացությունը, կատարելագործել իր մարմինը, որպեսզի ըստ արժանվույն ներկայանա մրցույթին:
Նա նշեց, որ ևս 3 մրցույթի մասնակցելու առաջարկ ունի Հնդկաստանում, Դոմինիկյան Հանրապետությունում և Թունիսում. «Miss tourism of the globe 2019-ի ժյուրիի անդամներից մեկն ինձ ասաց, որ շատ եմ ուշացել, ինձ ընտրելու հնարավորություն այլևս չունեն, սակայն հրավիրեց մասնակցելու Հնդկաստանում իր կողմից կազմակերպվող գեղեցկության մրցույթին»:
Հայաստանում ամաչեցի լողազգեստով ելույթ ունենալ, բայց միջազգային մրցույթում ներկայացել եմ
Միջազգային այս մրցույթներում կա նաև լողազգեստով ցուցադրություն, որոնցից Մոնիկան չի հրաժարվել: Մինչդեռ ամիսներ առաջ Հայաստանում անցկացվող մրցույթի ժամանակ Մոնիկան հրաժարվել էր լողազգեստով ելույթ ունենալ, արդյունքում մասնակցել էր միայն «Միսս աշխարհ Արմենիային»՝ բաց թողնելով «Միսս տիեզերք Արմենիա»-ն:
Հարցին, թե ինչու Հայաստանում հրաժարվեց լողազգեստով ելույթ ունենալ, միջազգային հարթակում՝ ոչ, նա պատասխանեց. «Երևի առաջին անգամ էր, մի քիչ վախեր ունեի: Ես Վանաձորից եմ, գուցե, դա էլ ազդեց և առաջին անգամ ամաչեցի: Հիմա դա ավելի սովորական է դարձել: Միջազգային բեմում չեմ կարող ասել՝ ես լողազգեստ չեմ հագնի: Այստեղ ընտրություն ունեի, գերադասեցի լողազգեստով ելույթ չունենալ»:

Եթե զգամ, որ պատրաստ եմ հաղթանակի, նորից կմասնակցեմ «Միսս Արմենիային»
Մոնիկան չի բացառում, որ երկրորդ անգամ կփորձի մասնակցել «Միսս Արմենիա»-ին, թեև այս դեպքում իր առաջադրանքը բարդանում է՝ 1-ին «Վիցե միսս»-ը միայն մեկ քայլ ունի առաջ գնալու համար: «Գուցե նորից մասնակցեմ, եթե զգամ, որ պատրաստ եմ հաղթանակի: Քանի որ «Վեցե միսս» էի ընտրվել, եթե չհաղթեմ, կլինի հետքայլ»,- ասաց նա:
Հաղթանակից մեկ քայլ հետ մնացած Մոնիկան վստահեցնում է՝ այս տարի ուրախացել էր, որ ինքը չի հաղթել, քանի որ պատրաստ չէր հաղթանակի:
«Շատ ուրախ էի Լիանայի համար, քանի որ նա ավելի փորձառու ու պատրաստված էր: Չեմ պատկերացնում, թե ինչ կլիներ, եթե հաղթեի, որովհետև շատ անփորձ էի, սակայն եթե երկրորդ անգամ մասնակցեմ, նպատակս կլինի միայն հաղթելը: «Վիցե միսս» դառնալը ևս շատ անսպասելի էր ինձ համար: Մրցույթին մասնակցել էի ընտանիքիս առաջարկով, բայց չէի էլ ենթադրում, որ այսպիսի արդյունք կունենամ, ուղղակի մասնակցում էի: Քվեարկությունից հետո հասկացա, որ շանսերս մեծ են, որովհետև շատ մեծ աղմուկ բարձրացավ: Հասկացա, որ շանսերս ավելի մեծ են, պետք է մի քիչ ավելի վստահ լինել: Ինչ վերաբերում է հաղթանակին, չէի տխրել: Թե՛ Լիանան, թե՛ Դայանան արժանի հաղթողներ էին: Միակ տարին էր, որ չքննադատեցին հաղթողներին, որովհետև շատ ճիշտ ընտրություն էր արված»,- ասաց նա:
Մոնիկան նշեց, որ մրցույթն իրեն ճանաչելիություն և ինքնավստահություն է տվել:

Ցածրահասակ լինելը, երբեմն, խանգարում է
Մոնիկայի խոսքով՝ իր հասակը 1:69 սմ է, քաշը՝ 49 կգ, չափսերը՝ 89/62/91: Մոդելի համար նա փոքր-ինչ ցածրահասակ է, բայց դրանից շատ չի սրտնեղում:
«Չափանիշները վաղուց փոխվել են, առավել ևս միջազգային մրցույթներում կան շատ բարձրահասակ ու շատ ցածրահասակ աղջիկներ: Իհարկե, լավ կլիներ մի քիչ ավելի հասակով լինեի, սակայն չեմ ֆիքսվում դրա վրա: Դա այդքան էլ չի խանգարում ինձ, կարևորը ժպիտն ու ինքնավստահությունն են: Ես հիմա ավելի ինքնավստահ եմ դարձել, որովհետև փորձ եմ ձեռք բերել»,- ասաց մա:
Այնուամենայնիվ, Մոնիկան անկեղծացավ, որ եղել են քասթինգներ, որոնք չի անցել հենց հասակի պատճառով. «Պոդյումին քայլելու համար պետք է ավելի բարձրահասակ լինել: Լինում են դեպքեր, երբ գնում եմ քասթինգի, չեմ ընտրվում, սակայն դրանից չեմ նեղվում: Լինում են նաև դեպքեր, երբ դիզայներներն իրենք են հրավիրում ցուցադրելու իրենց հագուստը»:
Մոնիկան ասաց, որ արհեստական որևէ միջամտության չի դիմել: Սա չի նշանակում, որ նա իրեն համարում է աշխարհի ամենագեղեցիկ աղջիկը, պարզապես ներդաշնակություն է գտել իր արտաքնի հետ: «Իհարկե, ինչպես բոլոր աղջիկները, ես էլ եմ թերություններ գտնում ինձ վրա, սակայն կարծում եմ, որ մենք պետք է մեզ ընդունենք այնպիսին, ինչպիսին կանք: Չեմ պատրաստվում ինձ փոփոխել: Հիմա աշխատում եմ կազմվածքս ավելի կատարելագործելու վրա, սննդակարգ եմ պահում, մարզվում եմ, որովհետև եթե ունեմ նպատակ. պետք է հասնեմ դրան: Այնպես չէ, որ նախկինում կազմվածքի խնդիր ունեի, սակայն այս ընթացքում ավելի եմ ձգվել, կեցվածքս է փոխվել»,- ասաց նա:

Տեղափոխվել եմ Երևան
Մոնիկան «Միսս Արմենիային» մասնակցելու շրջանում ամեն օր Վանաձորից գալիս էր Երևան, ինչը նրա համար շատ բարդ էր: Այդ շրջանում Երևանում բնակվել մոնիկան չէր կարող, քանի որ սովորում էր Վանաձորի պետական համալսարանում, հիմա նա տեղափոխվել է Երևան և ուսումը շարունակում է Բրյուսովի անվան համալսարանում:
Երևանում նա ապրում է իր մորաքրոջ հետ: Ընտանիքից հեռու լինելը մի կողմից բարդ է, մյուս կողմից ավելի ինքնուրույն է դարձրել 20-ամյա աղջկան. «Անսովոր է ընտանիքիցս հեռու լինել, հաճախ եմ գնում մեր տուն: Միաժամանակ, նկատում եմ, որ ավելի ինքնուրույն եմ դարձել, հատկապես, որ աշխատում եմ նաև իմ գումարը: Այս աշխատանքն ինձ բավականին եկամուտ է բերում, այս փուլում բավարարում է հոգալ իմ ծախսերը»,- ասաց նա ու հավելեց, որ որպես մոդել ներկայանալու առաջարկներ շատ ունի, նկարահանվել է նաև տեսահոլովակներում: Նրա խոսքով՝ դրանք լսարանի դատին կհանձնեն ավելի ուշ:
Հարազատ Վանաձորի մասին, սակայն, Մոնիկան չի մոռացել: «Փորձում եմ իմ հնարավորությունների չափով օգտագործել իմ խոսքը: «Միսս Արմենիայի» քասթինգի ժամանակ ասել էի, որ եթե հաղթեմ, իմ տիտղոսը կօգտագործեմ իմ քաղաքի մանկատանը բարեգործություն անելու նպատակով: Չնայած առաջին տեղը չզբաղեցրի, տիտղոսս օգտագործեցի ու բարեգործական այց կազմակերպեցի Վանաձորի մանկատուն: Բացի նյութական աջակցությունը, փոքրիկ գեղեցկության մրցույթ կազմակերպեցինք, քանի որ շատ աղջիկներ երազում են մոդել դառնալ,- ասաց նա:

















