«Ինձ համար չկան բաց և փակ տեսարաններ, կա կերպար, որի կյանքով դու ապրում ես». Ֆրիդա Յորք

«Պարոն Գալստյանի հետ հանդիպում ունեցա, որի ժամանակ նա այնպես պատմեց Նոռայի մասին, որ չսիրահարվել այդ կերպարին չէր լինի։

Բացի այդ, ինձ գրավեց այն, որ կարող էի բացասական կերպար մարմնավորել։ Փնտրել և դուրս բերել իմ միջից մեկ այլ կնոջ, որին ոչինչ չի կանգնեցնում»,-

Tert.am Life-ի հետ զրույցում՝ խոսելով «Բեմ» ֆիլմում իր մարմնավորած կերպարի մասին, պատմեց դերասանուհի Ֆրիդա Յորքը:

Դերասանուհին նշեց, որ կցանկանար, որ նկարահանման հրապարակում ժամանակը սահմանափակ չլիներ և ռեժիսորի հետ աշխատելու ժամանակ շատ ունանար։

«Անչափ կարևոր եմ համարում զրույցներն ու միջավայրը, երբ ստեղծագործ մարդկանց հաջողվում է միմյանց մտքերն ու վերլուծությունները մեկտեղել։

Այդ ժամանակ է, որ կերպարը ծնունդ է առնում։

Ինձ խանգարում էր, որ ժամանակ չկար։

Լիլիթը, ով մարմնավորում էր Ժանեթին ՝ իմ կողմից շատ սիրված մարդ է։

Մենք ճանաչում ենք իրար դեռ պատանեկության տարիներից և շատ մտերիմ ենք։

Սկզբում մտավախություններ ունեի, մտածում էի՝ ինչպես եմ կարողանալու ատելությամբ նայել մի մարդու, ում շատ եմ սիրում, բայց հետո համոզվեցի և հասկացա, որ ավելի հեշտ կարելի է տրվել խաղին, երբ խաղընկերոջդ վստահում և սիրում ես։

Խորեն Լևոնյանի հետ աշխատելը շատ հեշտ է։ Երբ աշխատում ես իր գործին տիրապետող մարդկանց հետ, դա վայելք է»,- պատմեց մեր զրուցակիցը:

Անդրադառնալով ֆիլմի բաց տեսարաններին և հայ հանդիսատեսի ընկալմանն ու արձագանքին՝ Ֆրիդա Յորքն ընդգծեց, որ իր

համար չկան բաց և փակ տեսարաններ:

«Կա կերպար, որի կյանքով դու ապրում ես և պարտավոր ես պատմել նրա կյանքից դրվագներ, որպեսզի բացահայտես հանդիսատեսին քո կերպարը։

Հայ հանդիսատեսին չեմ ցանկանում թերագնահատել:

Մինչև այսօր չեմ առնչվել որևէ բաց տեսարանի հանդեպ հնչեցրած վատ կարծիքի։

Երբ դերասանը հստակ է պատկերացնում իր կյանքի և ստեղծագործ կյանքի սահմանները, հանդիսատեսը ևս չի խախտում այն»,- անկեղծացավ Ֆրիդան ու հավելեց, որ միակ անհարմարությունն այն էր, որ Ստեփանին մարմնավորող կերպարը դերասան չէր։

Դերասանուհին նաև նշեց, որ ինքնաքադատ է և շատ երկար ժամանակ է պահանջվում, որ ընդունի ինքն իր արած աշխատանքները:

«Երևի այդ պատճառով է, որ շարունակում եմ նկարահանվել: Շատ հարցերի մասին եմ ուզում խոսել այն դերերի միջոցով, որոնց ես այդքան սպասում եմ և որոնք սպասում են ինձ։

Այս պահին մի ներկայացման առաջարկ ունեմ, որի փակագծերը շատ վաղ է բացելը»,- ամփոփեց դերասանուհին։

 

Հեղինակ՝ Անի Մնացականյան